Gjykata hedh poshtë kërkesën e Leonardës për kthim në Francë

Sipas vendimit gjyqësor, prindërit e Leonardës nuk mund të integrohen në Francë. Ndërsa fëmijët mund të vazhdojnë shkollimin e tyre edhe në Kosovë

Rreth tre muaj më parë nëpër rrugët e Parisit dhe qyteteve tjera franceze protestohej me të madhe kundër veprimit të policisë, e cila pati dëbuar vajzën rome Leonarda Dibrani në Kosovë. Mllefi i protestuesve kishte të bënte sidomos me mënyrën e ndërhyrjes së policëve, të cilët nxënësen 15 vjeçare e kishin marrë nga autobusi ku ajo me shokët e shkollës ishte pjesë e një ekskursioni. Edhe pas kthimit në Kosovë, Leonarda ka qenë për një kohë në kryetitujt e medieve franceze e evropiane, transmeton nzz.ch .

Fillimisht asaj i ishte lejuar të kthehej në Francë për të vazhduar shkollimin por ajo kishte vënë si kusht kthimin e gjithë familjes, po ashtu të dëbuar.

Rasti “Leonarda” kishte shkuar deri në qarqet më të larta të politikës franceze, duke u bërë temë preokupimi edhe për vetë presidenin e republikës, François Hollande.

Ndërkohë familja Dibrani ka bërë një kërkesë para gjykatës administrative në qytetin Besançon për leje qëndrimi në Francë. Të martën (sot) kjo gjykatë ka hedhur poshtë kërkesën e  familjes rome me prejardhje nga Kosova.

Sipas vendimit gjyqësor, nuk ka indikacione që prindërit e Leonardës do të mund të integroheshin në shoqërinë franceze. Veç kësaj, fëmijët e kësaj familje mund të vazhdojnë shkollimin e tyre edhe në Kosovë.

Familja Dibrani ka të drejtë ankese kundër këtij vendimi para një gjykate të apelit