Gjoba për telefonim gjatë vozitjes mbetet 100 franga

Përdorimi i telefonave mobilë e pesëfishon rrezikun për ndeshje në trafik

Gjobat për përdorim të telefonit mobil gjatë vozitjes do të mbeten ashtu siç kanë qenë, 100 franga. Kështu ka vendosur me shumicë votash Këshilli Nacional i Parlamentit të Zvicrës, duke iu kundërvënë një mocioni të bërë nga deputetja e SP-PS Maya Ingold. Mocionin në fjalë e kishte përkrahur edhe Qeveria Federale.

101 vota kanë qenë kundër ngritjes së propozuar të gjobës dhe 77 në favor të saj. Parlamentarja Ingold dhe Qeveria, duke propozuar ngritjen e gjobave për telefonim gjatë vozitjes kanë menduar se një gjë e tillë do të shërbente si frikësim për shoferët dhe parandalim për një veprim të tillë.

Megjithatë, edhe në tekstin e mocionit ishte kërkuar që të shtrenjtohej gjoba vetëm për telefonim por jo edhe për shkrim të mesazheve telefonike ose përdorim të navigacionit. 

Sipas organizatave që merren me rreziqet në trafik, përdorimi i telefonave mobilë e pesëfishon rrezikun për ndeshje në trafik.