Gjenevë: Debat rreth suksesit shkollor të fëmijëve emigrantë

Tryeza mbahet sonte, nga ora 18:30-20:00, adresa: UPA, Chemin Surinam 7, 1203 Gjenevë

Siç edhe e kemi botuar më herët lajmin, sonte Universiteti Popullor Shqiptar, në bashkëpunim me portalin albinfo.ch organizojnë një debat me specialistë për temën e suksesit shkollor si dhe integrimit të të rinjve me prejardhje emigruese.

Në fakt, integrimi i suksesshëm i të rinjve ndërlidhet ngushtë me suksesin në arsimimin, sepse ky i fundit e kushtëzon kyçjen profesionale të personave me prejardhje të huaj në Zvicër.

Në suaza të diskutimeve, do të nënvizohen vështirësitë që hasin prindërit migrantë në shkollimin dhe arsimimin e fëmijëve të tyre, si dhe të kuptohen mekanizmat shkollorë ekzistues për t’ iu ndihmuar atyre.

Prezantimet e intervenuesve të ftuar në këtë tryezë priten po ashtu të shtjellojnë realitetin ekzistues të familjeve migrante, të cilat janë me nivel arsimor më të ulët se të atyre të vendit pritës dhe se kjo ndikon po ashtu edhe në gjasat e ngritjes sociale të fëmijëve të tyre.

Një lajm të mëhershëm që kemi botuar, një studim i realizuar nga Universiteti i Freiburgu-t në Gjermani, nënvizonte faktin se fëmijët e punëtorëve kanë më shumë vështirësi për t’u regjistruar në gjimnaze.

Prandaj, kjo tryezë synon ta shtrojë debatin për këtë çëshjtje, por edhe të hapë shtigje se si të lehtësohet trajektorja arsimore dhe profesionale e të rinjve me prejardhje të familjeve migruese.

Për më shumë informacione