FFK paralajmëron masa të ashpra: Kush prek integritetin e garave do të përballet me përjashtim

Federata e Futbollit e Kosovës (FFK) ka reaguar lidhur me deklaratat e fundit të disa zyrtarëve të klubeve në rrjete sociale, duke sqaruar se integriteti i garave mbetet prioritet i saj kryesor.

FFK bën të ditur se të gjitha ndeshjet e kampionatit monitorohen në mënyrë të vazhdueshme, si nga Komisioni i Integritetit të Garave brenda federatës, ashtu edhe nga një organizatë e kontraktuar nga UEFA që merret me analizimin e ndeshjeve për çështje të integritetit sportiv.

Sipas FFK-së, çdo ndeshje mbikëqyret nga përfaqësues të posaçëm të komisioneve përkatëse, të cilët raportojnë çdo situatë që mund të cenojë rregullsinë e garës. Federata thekson se nuk toleron asnjë formë të manipulimit të ndeshjeve apo ndikimit të paligjshëm në rezultate.

Sa i përket deklaratave publike të zyrtarëve të klubeve, FFK njofton se ato do të trajtohen sipas rregulloreve në fuqi dhe se mund të iniciohen procedura disiplinore. Në rast nevoje, do të përfshihen edhe institucionet relevante si Policia e Kosovës dhe organet tjera kompetente.

FFK po ashtu është në komunikim të vazhdueshëm me UEFA-n, e cila është e informuar për situatën dhe vazhdon monitorimin e ndeshjeve të kampionatit.

Federata u bën thirrje të gjithë individëve dhe klubeve që kanë pretendime apo akuza, t’i paraqesin ato me fakte konkrete pranë organeve kompetente, në mënyrë që të sigurohet një proces i drejtë dhe transparent.

Në fund, FFK rithekson se çdo klub apo individ që vërtetohet se është i përfshirë në manipulim të ndeshjeve do të përballet me masa të rrepta disiplinore, përfshirë përjashtimin nga garat, në përputhje me rregulloret e FFK-së, UEFA-s dhe FIFA-s.