ETH Cyrih mbetet në mesin e 10 universiteteve më të mira në botë për të 12-in vit radhazi

Universiteti zviceran renditet i teti në botë, ndërsa edhe disa institucione të tjera të arsimit të lartë në Zvicër përfshihen në mesin e më të mirëve globalisht

ETH Zürich ka ruajtur pozicionin e tij ndër universitetet më prestigjioze në botë, duke u renditur në mesin e 10 universiteteve më të mira për të 12-in vit radhazi, transmeton albinfo.ch.

Në renditjen e këtij viti, e cila përfshin 1,500 universitete nga 106 vende të botës, ETH Cyrih zë vendin e tetë në nivel global dhe mbetet universiteti më i vlerësuar në Evropën kontinentale.

Institucioni ka shënuar përmirësim të dukshëm në disa tregues kyç, përfshirë reputacionin te punëdhënësit, mundësitë e punësimit për të diplomuarit dhe bashkëpunimin ndërkombëtar në fushën e kërkimit shkencor.

Suksesi i arsimit të lartë zviceran nuk kufizohet vetëm te ETH Cyrih. Edhe EPFL, me seli në Lausanne, renditet i 22-ti në botë, duke konfirmuar pozitën e fortë të Zvicrës në arsimin universitar dhe kërkimin shkencor.

Ndërkohë, Universität Zürich renditet në vendin e 98-të, ndërsa universitetet e Gjenevë, Bazel, Bernë, Lausanne dhe Università della Svizzera italiana (USI) figurojnë gjithashtu në mesin e 500 universiteteve më të mira në botë.

Rezultatet konfirmojnë edhe një herë pozitën e Zvicrës si një nga vendet me sistemin më cilësor të arsimit të lartë dhe kërkimit shkencor në nivel ndërkombëtar./Albinfo.ch

---