Enis Alushi, incident në një diskotekë

Sipas kallëzimit penal, Alushi i ka fyer, sharë dhe kërcënuar dy vajzat, pasi që kolegu i tij Mosquera i kishte goditur ato me grushte

Futbollisti i bundesligës së dytë gjermane Enis Alushi, i njohur më shumë si i dashuri i futbollistes shumë të njohur Fatmire Bajramaj, duket se është implikuar së fundi në një incident jo të vogël. Alushi ishte në një diskotekë në Paderborn së bashku me ish kolegun e tij nga SC Paderborn të dielën që shkoi, kur shoku i tij i kishte rrahur dy vajza të moshës 21 dhe 25 vjeçare. Ndërkohë, është ngritur edhe kallëzimi penal ndaj të dyve.

Futbollisti shqiptar me këtë rast duket të ketë luajtur “rol dytësor”. Ai, sipas kallëzimit, të prezantuar për medie nga avokati i dy vajzave, dr. Jolmes,i ka fyer, sharë dhe kërcënuar dy vajzat pasi që kolegu i tij i kishte goditur ato me grushte. Avokati ka thënë se dy vajzat nuk i kanë njohur fare dy futbollistët e rinj por i kishin identifikuar më vonë, pasi kishin shfletuar librin me fotografi të skuadrës SC Paderborn.

Sipas tij, vajzat kanë pësuar lëndime serioze në fytyrë dhe vazhdojnë të jenë nën përkujdesje mjekësore.

Nga ana tjetër Enis Alushi i kundërshton deklarimet e avokatit. Ai thotë: “kjo është 99 për qind e pavërtetë. Unë jam përpjekur t`i ftoh gjakrat. Por, kur truprojat tashmë e kishin vënë situatën nën kontroll, vajzat vazhdonin të ndërsenin. Për këtë arsye unë kam kërkuar nga ato që të shporreshin”, shkruan Westfalen.blatt.de 

Ndërsa avokati i vajzave thotë se si futbollistë, duhet tëjenë pikërisht ata që duhet të kujdesen për “fair play”. Nisur nga kjo, më e pakta që duhet të bëjnë Mosquera dhe Alushi është të kërkojnë falje.

Në anën tjetër Mosquera tashmë ka marrë dënimin nga skuadra e tij. Trajneri Schmidt e ka “lënë të lirë” atë.

Sipas gazetës, Enis Alushi edhe më parë, në tetor 2010 ka qenë i implikuar bashkë me një koleg të skuadrës në një incident të dhunshëm. Por, në mungesë provash, procedura ndaj tyre qe pezulluar.