Ekspertët: Prindërit e ardhshëm duhet të shmangin alkoolin edhe para shtatzënisë

Konsumi i alkoolit gjatë shtatzënisë mund të shkaktojë pasoja serioze dhe të përhershme për shëndetin e foshnjës. Ekspertët rekomandojnë që si gratë, ashtu edhe burrat që planifikojnë të bëhen prindër, ta shmangin alkoolin që disa javë apo muaj para konceptimit.

Në Zvicër, rreth 1700 të porsalindur në vit vlerësohet se preken nga çrregullimet e spektrit të alkoolit fetal (ÇSAF). Bëhet fjalë për çrregullime që shpesh nuk janë të dukshme menjëherë pas lindjes, por mund të shfaqen me kalimin e kohës përmes vështirësive në kujtesë dhe të nxënë, problemeve të sjelljes, hiperaktivitetit apo vështirësive të konsiderueshme në krijimin e marrëdhënieve shoqërore.

Përballë kësaj situate, ekspertët në Zvicër po e theksojnë gjithnjë e më shumë rëndësinë e parandalimit.

“Rekomandimi ynë është që alkooli të mos konsumohet gjatë gjithë shtatzënisë. Në mënyrë ideale, që nga konceptimi dhe, në çdo rast, që nga momenti kur shtatzënia konfirmohet”, deklaroi Marina Delgrande Jordan, bashkëdrejtuese e kërkimeve në Addiction Switzerland, për radion zvicerane RTS.

Sipas saj, kjo do të thotë se gratë që planifikojnë të kenë fëmijë dhe partnerët e tyre duhet, në mënyrë ideale, të shmangin alkoolin edhe gjatë periudhës kur po planifikojnë shtatzëninë.

Rekomandimi vlen edhe për burrat

Ekspertët rekomandojnë që të dy partnerët ta ndërpresin konsumimin e alkoolit tre muaj deri në gjashtë javë para se të tentojnë të kenë fëmijë.

Për një kohë të gjatë është menduar se pasojat lidhen kryesisht me konsumimin e alkoolit nga nëna. Megjithatë, studimet e fundit kanë treguar se edhe konsumi i alkoolit nga babai mund të luajë rol.

“Për babain nuk bëhet fjalë për një toksicitet të drejtpërdrejtë, por për një toksicitet epigjenetik. Kjo do të thotë se spermatozoidet mund të përcjellin gjene që kanë pësuar ndryshime dhe që mund të mos shprehen siç duhet, duke krijuar gjithashtu probleme”, shpjegon Stéphane Sizonenko, mjek në Departamentin e Zhvillimit dhe Rritjes në Spitalet Universitare të Gjenevës (HUG).

Parandalimi mbetet thelbësor

Megjithëse rekomandimi për shmangien e alkoolit para konceptimit vlen për të dy partnerët, një pjesë e publikut ende nuk është në dijeni të tij.

Disa persona të intervistuar nga RTS kanë pranuar se nuk e dinin se rekomandohej ndërprerja e konsumimit të alkoolit para konceptimit.

Për disa të tjerë, edhe kur informacioni është i njohur, zbatimi i kësaj këshille mund të jetë i vështirë. Planifikimi i një shtatzënie nuk ka gjithmonë një afat të përcaktuar, çka e bën më të vështirë ruajtjen e abstinencës për një periudhë të pacaktuar.

Sipas një studimi të Addiction Switzerland, gati një në dy gra shtatzëna ka konsumuar alkool ndërmjet momentit të konceptimit dhe konfirmimit të shtatzënisë.

Aktualisht nuk ekzistojnë trajtime medikamentoze për çrregullimet e spektrit të alkoolit fetal. Për këtë arsye, parandalimi konsiderohet veçanërisht i rëndësishëm.

“Ekzistojnë trajtime mbështetëse për zhvillimin, si fizioterapia, terapia okupacionale dhe psikoterapia. Por sa më herët të zbulohen këto çrregullime, aq më mirë është për fëmijën”, thotë Sizonenko.

Mungojnë të dhëna të plota

Një tjetër problem është mungesa e të dhënave të plota dhe të përditësuara për përmasat e problemit në Zvicër.

Shifra prej rreth 1700 rasteve në vit është vetëm një vlerësim i bazuar në të dhëna të disa viteve më parë. Ekspertët e konsiderojnë këtë mungesë të dhënash një pengesë të rëndësishme për parandalimin dhe trajtimin e ÇSAF.

Pa statistika të sakta që tregojnë përmasat reale të fenomenit, çrregullimet e shkaktuara nga ekspozimi ndaj alkoolit gjatë zhvillimit të fetusit mbeten një problem i shëndetit publik që shpesh kalon pa u vënë re.

---