Dy nga të plagosurit sot në këtë qytet të Kosovës dyshohet se janë mërgimtarë

Të lënduarit, të moshës 25 deri në 35 vjeç, po trajtohen në Klinikën Emergjente. Sipas mjekëve, gjendja e tyre është e rëndë, por stabile.

Katër persona kanë mbetur të plagosur si pasojë e të shtënave me armë zjarri që ndodhën në qendër të Podujevës. Të lënduarit janë transportuar për trajtim në Qendra Klinike Universitare e Kosovës, transmeton albinfo.ch.

Sipas informacioneve fillestare, dyshohet se dy nga të plagosurit janë mërgimtarë.

Drejtori i Klinikës Emergjente në QKUK, Naser Syla, ka bërë të ditur se katër të plagosurit janë të moshës 25 deri në 35 vjeç dhe po u nënshtrohen ekzaminimeve të nevojshme mjekësore.

Ai theksoi se gjendja e tyre shëndetësore është e rëndë, por stabile, pavarësisht plagëve të marra nga armët e zjarrit.

Policia ka nisur hetimet për zbardhjen e rrethanave të ngjarjes dhe identifikimin e personave të përfshirë në incident./Albinfo.ch

 

Lajmi në përditësim…

---