Dogana e Kosovës: 430 euro është kufiri pa taksa për mallrat personale në aeroport

Foto FB: Dogana e Kosovës

Dogana e Kosovës ka paralajmëruar për kontrollet që kryhen në Aeroportin Ndërkombëtar të Prishtinës, “Adem Jashari”, duke rikujtuar udhëtarët për rregullat doganore gjatë hyrjes në Kosovë.

Sipas Doganës, zyrtarët doganorë kryejnë kontrolle të bagazheve dhe përdorin edhe skanerët si pajisje ndihmëse për identifikimin e mallrave që mund të jenë objekt i deklarimit.

Dogana ka bërë të ditur se udhëtarët që kalojnë përmes kanalit të gjelbër, duke deklaruar se nuk kanë mallra për të deklaruar, mund t’i nënshtrohen kontrollit doganor teksa për udhëtarët që hyjnë në Kosovë përmes trafikut ajror, kufiri i patatueshëm për mallrat e destinuara për nevoja personale është 430 euro për udhëtar, transmeton albinfo.ch.

Bëhet e ditur se në rastet kur vlera e mallrave personale tejkalon këtë kufi, udhëtarët duhet t’i deklarojnë ato në kanalin e kuq. Më pas, zyrtari doganor i informon për procedurat e mëtejshme doganore.

Institucioni u ka bërë thirrje udhëtarëve që të informohen dhe të deklarojnë saktë mallrat, në mënyrë që udhëtimi të jetë në përputhje me legjislacionin doganor.