Dënohet shqiptari për vrasjen e ish-policit

“Kërkoj falje për veprën e kryer. Unë kam ardhur në Itali për të dalë në gjyq dhe të dënohem për veprimet e mia”, deklaroi ai

Florind Marini është dënuar me 16 vjet burg, pasi është shpallur fajtor për vrasjen e ish-policit italian, Canozzi Ugo, 82-vjeç, raporton albinfo.ch.

26-vjeçari ishte pjesë e një bande grabitësish shqiptarë, ndërsa u futën për të vjedhur në banesën e ish-policit.

Sipas autoriteteve italiane, Florind Marini në bashkëpunim me dy shqiptarët e tjerë Lorenc Marini dhe Besnik Metushi, tashmë të dënuar, pasi lidhën këmbë e duar ish-policin, i shkaktuan vdekjen nga asfiksia duke i vënë sipër mbi fytyrë një jastëk.

Vrasja ndodhi më 15 janar të vitit 2013, ndërsa shqiptarët morën disa bizhuteri dhe qindra euro. Shqiptari ka kërkuar falje, por kot. “Kërkoj falje për veprën e kryer. Unë kam ardhur në Itali për të dalë në gjyq dhe të dënohem për veprimet e mia”, deklaroi ai.