Dasma mbretërore në Shqipëri

Tabloidi “Daily Mail”, kujton se si familja mbretërore shqiptare u dëbua nga vendi më 1939 pasi Shqipëria u pushtua nga fashistët italianë

Shqipëria ka organizuar ceremoninë e dytë martesore mbretërore pasi Princi Leka II u martua me të fejuarën e tij Elia Zaharia në një ceremoni luksoze, shkruan albinfo.ch.

Ky çift ishte fejuar në Paris në vitin 2010, por planifikimet për ditën e madhe i nisën vetëm pak muaj më parë.

Ceremonia përmbante të gjitha parakushtet e një dasme mbretërore me rreth 20 familje mbretërore nga e mbarë bota të pranishme, duke përfshirë Princin Michael nga Kent-kushëriri i parë i Mbretëreshës Elizabeth II e Britanisë së Madhe.

Të pranishme ishin edhe Princesha Lea nga Belgjika e Mbretëresha Sofia nga Spanja.

Mediumi britanik, “Daily Mail”, kujton se si familja mbretërore shqiptare u dëbua nga vendi më 1939 pasi Shqipëria u pushtua nga fashistët italianë.

Pas Luftës së Dytë Botërore, kur Komunistët morën pushtetin, Mbreti Zog, gjyshi i Princit Lekë, dhe familja e tij u konsideruan tradhtarë dhe iu hoq pushteti në tërësi dhe u fshinë nga librat e historisë.

Në këtë dasmë morën pjesë edhe shumë ‘VIP’. Rona Nishliu, Olta Gixhari, Ardit Gjebrea, Soni Malaj, Rudina Magjistari, Marsela Çibukaj kanë qenë disa nga të ftuarit që kanë uruar çiftin Zogu.

Ardit Gjebrea ka shkruar: “Me princeshën Zaharia në ditën e saj të dasmës. Jetë të lumtur!”.

“Jetë të lumtur e me shumë trashëgimtarë”, ka shkruar Rudina Magjistari në postimin e saj.

Ndërsa Soni Malaj ka shkruar: “Shumë e lumtur për ty mikja ime. Të trashëgohesh dhe qofsh përjetë e lumtur me princin tënd”.