Calmy Rey mbron Blocherin rreth aferës “Hildebrand”

Ajo e konsideron në rregull që një parlamentar që ka informacione të tilla t`i drejtohet presidentit të vendit

Ish presidentja dhe ish ministrja federale, Micheline Calmy Rey ka marrë në mbrojtje deputetin dhe nënkryetarin e SVP-UDC-së, Christoph Blocher. Këtë mbrojtje ajo e ka shfaqur në lidhje me rolin e Blocherit në aferën rreth ish kryetarit të Bankës Nacionale të Zvicrës (SNB), Hildebrand.

Rey ka thënë se e konsideron në rregull që një parlamentar që ka informacione të tilla t`i drejtohet presidentit të vendit, siç edhe ka vepruar Blocher në këtë rast.

Në intervistat e botuara në gazetat “Sonntagszeitung” dhe “Le Matin DImanche” Calmy Rey ka theksuar se kur ka marrë informatat nga Blocheri, ajo ka kërkuar sqarim rreth besueshmërisë së tyre. Pasi që është provuar vërtetësia e tyre ajo ka njoftuar Këshillin Federal dhe ka biseduar me presidentin e atëhershëm të SNB-së, Hildebrand.

Ndërsa në lidhje me çështjen e imunitetit prej deputeti të Blocherit, Rey ka theksuar se ky i fundit informatat ia ka dhënë menjëherë pasi ka bërë betimin si deputet nacional.