Një refugjat kurd nga Siria u dënua me burgim të përjetshëm pasi u shpall fajtor për vrasje dhe terrorizëm për një sulm vdekjeprurës me thikë në qytetin jugor austriak të Villach vitin e kaluar, ku humbi jetën një 14-vjeçar dhe u plagosën 5 persona të tjerë.
Prokurori i tha gjykatës në qytetin e Klagenfurtit se i riu u “radikalizua në një çast” nëpërmjet TikTok, duke habitur edhe vëllanë e tij, ndërsa i pyetur nga një gjyqtar, nëpërmjet një përkthyesi, nëse do ta kryente përsëri krimin nëse do t’i jepej mundësia, autori i rrëfyer i krimit pohoi me kokë në mënyrë pozitive, raporton ORF, transmeton albinfo.at.
Vendimi i gjykatës ishte unanim. I pandehuri tha se nuk kishte ndërmend të apelonte.
Ndryshe, ky ishte sulmi i dytë xhihadist në Austri, pasi një person vrau katër persona në Vjenë në nëntor të vitit 2020, përpara se të qëllohej për vdekje nga policia.
Në anën tjetër, një vendim pritet sot në gjyqin e një austriaku 21-vjeçar të akuzuar për planifikimin e një sulmi terrorist në një koncert të Taylor Swift në Vjenë në vitin 2024. Ai është deklaruar fajtor dhe mund të dënoeht me deri në 20 vjet burg.
