Armand Duka merr pjesë në eventin e FIFA-s në New York, takohet me Donald Trump dhe Gianni Infantino

Presidenti i FSHF-së ishte pjesë e ceremonisë së organizuar në prag të finales së Kupës së Botës 2026, ku morën pjesë drejtuesit më të lartë të futbollit botëror dhe presidenti amerikan.

Presidenti i Federatës Shqiptare të Futbollit (FSHF), Armand Duka, mori pjesë në eventin e organizuar nga FIFA në Trump Tower në New York, në prag të finales së Kupës së Botës FIFA 2026, përcjell albinfo.ch.

Në aktivitet morën pjesë presidenti i FIFA-s, Gianni Infantino, presidenti i Shteteve të Bashkuara të Amerikës, Donald Trump, anëtarë të Këshillit të FIFA-s, drejtues të federatave kombëtare nga e gjithë bota, si dhe legjenda të futbollit ndërkombëtar.

Gjatë eventit, Duka pati rastin të takohej dhe të bashkëbisedonte me presidentin amerikan Donald Trump, presidentin e FIFA-s Gianni Infantino dhe drejtues të tjerë të futbollit botëror. Takimet u zhvilluan në kuadër të aktivitetit që shënoi suksesin e edicionit më të madh në historinë e Kupës së Botës.

Në fjalën e tij, Gianni Infantino e cilësoi Botërorin 2026 si një sukses të jashtëzakonshëm.

“Kjo Kupë Bote i ka tejkaluar të gjitha pritshmëritë. Nuk është vetëm Kupa e Botës më e madhe e të gjitha kohërave, por edhe ngjarja më e madhe njerëzore, sociale dhe kulturore që njerëzimi ka parë ndonjëherë”, tha ai.

Edhe presidenti amerikan Donald Trump e vlerësoi turneun si një ngjarje historike.

“Ky ka qenë një turne si askush tjetër, me konkurrencë të jashtëzakonshme dhe momente të paharrueshme që kanë bashkuar botën. Është eventi sportiv më i suksesshëm në histori”, deklaroi Trump.

Kupa e Botës FIFA 2026 ka vendosur rekorde të reja, me mbi 6.6 milionë tifozë në stadiume dhe një mesatare mbushjeje prej 99.7 për qind. Turneu u zhvillua për herë të parë me 48 kombëtare dhe u organizua nga tre vende pritëse: Shtetet e Bashkuara të Amerikës, Kanadaja dhe Meksika.

Pjesëmarrja e Armand Dukës në këtë aktivitet konfirmon rolin aktiv të Federatës Shqiptare të Futbollit në strukturat ndërkombëtare të futbollit dhe bashkëpunimin e saj të vazhdueshëm me FIFA-n.

---