Altin Lala nënshkruan për Bajernin!

Nga ai pritet të ndihmojë ekipin e dytë të Bayernit që nën trajnerin Mehmet Scholl të kalojë në ligën e tretë të Gjermanisë

Pas 14 vitesh të kaluara në Hannover 96 Altin Lala 36 vjeçar, pak para “pensionimit” bën një lëvizje të befasishme. Dhe jo më pak se në drejtim të Bajernit të Munihut! Sigurisht, Lala atje nuk do të luajë në skuadrën ku luajnë Robben, Ribbery e Schweinsteiger me kompani dhe, prej korrikut, edhe Shaqiri. Jo. Ai do të jetë një përforcim për skuadrën e dytë të DC Bayernit të madh, klubit që mban rekordin për titujt e kampionit të futbollit në Gjermani.

“Po, unë kam vendosur. Do të nënshkruaj për Bajernin” i ka deklaruar Lala gazetës “Bild”.

Tash merret vesh se kërkesa e Bajernit për Lalën kishte mbërritur te përgjegjësit e Hannoverit para disa javësh. Ndërsa tash së fundi edhe oferta konkrete, sipas të cilës Lala do të ketë një kontratë njëvjeçare për ekipin e dytë të Bajernit.

“Javën tjetër mendoj se do të shkoj në Munih për të bërë kontrollimin mjekësor, e pastaj do ta nënshkruaj edhe kontratën. Jam i kënaqur, është një gjë shumë e mirë”, thotë Lala.

Futbollisti që ka luajtur 78 ndeshje për kombëtaren e Shqipërisë pritet të ndihmojë ekipin e dytë të Bayernit që nën trajnerin Mehmet Scholl të kalojë një kategori më lartë, në ligën e tretë të Gjermanisë.