Ai i gostit, ata e plaçkisin!

Mysafirët e tij të rinj, papritmas e kërcënojnë plakun me një thikë ndërsa ia kishin lidhur këmbët dhe duart me një shirit ngjitësi dhe ia mbyllin gojën. Një plak 81 vjeçar zviceran i thërret tre të rinj shqiptarë në shtëpinë e tij. Dhe pasi i gostit, duke u ofruar edhe alkool, tre të rinjtë ia […]

Mysafirët e tij të rinj, papritmas e kërcënojnë plakun me një thikë ndërsa ia kishin lidhur këmbët dhe duart me një shirit ngjitësi dhe ia mbyllin gojën.

Një plak 81 vjeçar zviceran i thërret tre të rinj shqiptarë në shtëpinë e tij. Dhe pasi i gostit, duke u ofruar edhe alkool, tre të rinjtë ia kthejnë atij të mirën me dhunë. Për pasojë, në gjykimin e përfunduar dje në Cyrih, dy sulmuesit e kapur, shtetas shqiptarë, kanë marrë nga 21 muaj dënim me kusht dhe dëbim nga Zvicra.

Ajo që i kishte ndodhur plakut zemërgjerë ishte një ankth i vërtetë. Mysafirët e tij të rinj, papritmas e kishin kërcënuar atë me një thikë ndërsa ia kishin lidhur këmbët dhe duart me një shirit ngjitësi dhe ia kishin mbyllur gojën me një gjësend. Pastaj ata ia marrin çelësin e kasafortës, e godasin atë shumë herë në kokë dhe ia nxjerrin unazat nga gishtërinjtë.

Në kasafortën e plakut tre të rinjtë marrin para e stoli në vlerë prej rreth 5600 frangash dhe ikin, duke e lënë të vetëm në dhomë plakun e keqtrajtuar dhe të lidhur. Vetëm pasi kishin kaluar disa orë, ai kishte mundur të çlironte gojën dhe të bërtiste për ndihmë. Pasi që policia e shpëton nga gjendja në të cilën ndodhej, atij i duhet të qëndrojë disa ditë në spital për tu shëruar nga plagët e marra.

Dy nga dorasit brutalë janë kapur në muajin shkurt në kantonin e Gjenevës. Ata kanë pranuar plotësisht veprën dhe kanë shprehur pendimin e tyre të thellë. “Një herë dhe kurrë më”, ka thënë para gjyqit njëri prej tyre, duke fajësuar alkoolin për brutalitetin e treguar.

Me një vendim mëshirues, gjykata ka shpërblyer pendimin e tyre, duke i dënuar dy dorasit kryesorë me nga 21 muaj heqje lirie me kusht për veprën penale, grabitje.

Veç kësaj, ata janë detyruar që viktimës, përveç dëmshpërblimit prej 6000 frangash, t`ia paguajnë edhe një kompensim prej 10 mijë frangash, për dhembjen e shkaktuar.

Dy të gjykuarit, pasi kanë qëndruar në burg nga 117 ditë, duhet t`i dorëzohen sot Zyrës Federale për Migracion për tu dëbuar në Shqipëri.