Aeroplani i linjës Hamburg – Prishtinë ateroi të shtunën në Beograd për shkaqe teknike

Ministri i Mjedisit, Planifikimit Hapsinor dhe Infrastrukturës, Liburn Aliu, ka njoftuar se fluturimi i së shtunës i linjës Hamburg – Prishtinë, për shkaqe teknike, është detyruar të aterojë në Beograd.

“Fluturimi i planifikuar nga Hamburg – Gjermani për në Prishtine nga operatori ajror ‘Eurowings’ (Flt.Nr. EW5704), i nisur nga Hamburg në ora 14:30, me 155 udhëtarë në bord, për shkaqe teknike është detyruar të aterojë ne aeroportin ‘Nikola Tesla’ në Beograd”, ka shkruar ministri Aliu.

Ai shtoi se operatori ajror Eurowings, menjëherë ka organizuar dhe ka dërguar një aeroplan alternativ (Flt. Nr. EW6005) i cili ka marrë udhëtarët e mbetur në aeroportin e Beogradit, dhe në orën 22:56 ka fluturuar me udhëtarët e njëjtë për në qytetin e Köln në Gjermani, ku pritet të aterrojë rreth orës 00:45 pas mesnatës.

“Autoritetet shtetërore të Kosovës, në kordinim me aeroportin e Prishtinës kemi qenë në komunikim dhe kordinim të vazhdueshëm me operatorin ajror Eurowings për sigurinë dhe mirëqenien e udhëtarëve tanë që ishin në këtë fluturim”, ka vazhduar më tej i pari i MMPHI-së.

Ai ka shtuar se fluturimi i udhëtarëve për në Kosovë do të organizohet menjëherë më tutje nga operatori ajror sipas procedurave të aplikuara në raste të tilla.

“Informata me të detajuara në lidhje me rastin do të marrim nga operatori Eurowings ditët në vijim”, ka përfunduar Aliu njoftimin e tij.