Trump premton 5,000 dollarës nëse republikanët fitojnë zgjedhjet

Presidenti amerikan Donald Trump ka deklaruar se qytetarët e rritur në SHBA mund të përfitojnë nga një pagesë prej 5,000 dollarësh nëse Partia Republikane arrin të ruajë kontrollin mbi Dhomën e Përfaqësuesve dhe Senatin pas zgjedhjeve të nëntorit.

Gjatë një konvente republikane në Dallas, Trump e cilësoi pagesën si një “dividend Trump” dhe tha se paratë do të duhej të shpenzoheshin brenda Shteteve të Bashkuara.

Megjithatë, ende nuk janë bërë të qarta detajet se si do të financohej dhe zbatohej kjo pagesë. Duke marrë parasysh numrin e madh të qytetarëve të rritur në SHBA, një program i tillë do të kërkonte një shumë të jashtëzakonshme financiare, që mund të arrinte rreth 1.35 trilion dollarë.

Në fjalimin e tij, Trump e lidhi drejtpërdrejt rezultatin e zgjedhjeve me politikat e administratës së tij, duke u bërë thirrje amerikanëve të mbështesin republikanët. Ai u shpreh optimist për ekonominë amerikane dhe sulmoi demokratët, duke i akuzuar për politika që, sipas tij, do ta dëmtonin vendin.

Trump foli gjithashtu për konfliktin me Iranin, duke mbrojtur vendimin e SHBA-së për të ndërmarrë sulme ndaj objektivave iraniane. Ai parashikoi se çmimet e naftës do të ulen pas përfundimit të luftës dhe paralajmëroi Teheranin lidhur me aktivitetet në një zonë ku dyshohet se ndodhen objekte bërthamore.

Konventa republikane në Dallas shërbeu si një platformë për mobilizimin e elektoratit për zgjedhjet e mesmandatit të 3 nëntorit. Fjalimet e republikanëve u përqendruan kryesisht në kritikat ndaj demokratëve, veçanërisht për çështjet e sigurisë kufitare dhe politikat sociale.