Gurët e Adriatikut bëhen art: Luan Bajraktari me ekspozitën “Beneath the Tongue, a Pebble” në Kroaci

“Beneath the Tongue, a Pebble”: Luan Bajraktari sjell në Kroaci një ekspozitë mbi kujtesën, identitetin dhe fëmijërinë

Artisti Luan Bajraktari po prezanton në Kroaci ekspozitën “Beneath the Tongue, a Pebble”, e cila është hapur në Galerija-Galleria Rigo në Novigrad dhe qëndron e hapur deri më 3 shtator 2026, shkruan albinfo.ch.

Ekspozita është ndërtuar mbi një seri punimesh të krijuara nga gurë të mbledhur përgjatë bregdetit të Adriatikut. Për Bajraktarin, këta gurë nuk janë thjesht materiale natyrore, por bartës të kujtimeve dhe përvojave personale.

 

Një nga instalacionet qendrore përbëhet nga një sipërfaqe e mbuluar me gurë, ku vizitorët mund të ecin mbi të. Në këtë mënyrë, përvoja e veprës nuk mbetet vetëm vizuale, por bëhet edhe fizike, përmes hapave, peshës së trupit dhe kontaktit me materialin.

Në disa prej punimeve, gurët janë riprodhuar në bronz. Ndryshimi i materialit nga guri i zakonshëm në metal të qëndrueshëm krijon një lidhje mes kujtesës, kohës dhe dëshirës për të ruajtur fragmente të së kaluarës.

 

 

Bajraktari, i lindur më 1979, jeton dhe punon mes Vjenës dhe Prishtinës. Ai ka studiuar skulpturë në Akademinë e Arteve të Bukura në Prishtinë dhe në Akademinë e Arteve të Bukura në Peruxhia të Italisë. Në praktikën e tij artistike punon me skulpturë, instalacion dhe vizatim, duke eksploruar kujtesën, përdorimin e objekteve dhe mënyrën se si ato marrin kuptime të reja.

Përmes “Beneath the Tongue, a Pebble”, artisti rikthen në hapësirën e artit gurët e thjeshtë të bregdetit, duke i shndërruar në objekte që flasin për fëmijërinë, kujtesën dhe identitetin./Albinfo.ch

---