Aeroporti i Prishtinës me rritje gjatë korrikut, mbi 476 mijë pasagjerë

Aeroporti Ndërkombëtar i Prishtinës “Adem Jashari” ka regjistruar një rritje të numrit të udhëtarëve dhe fluturimeve gjatë muajit korrik, krahasuar me të njëjtin muaj të vitit të kaluar.

Të dhënat e publikuara nga aeroporti tregojnë se gjatë korrikut në këtë aeroport kanë udhëtuar gjithsej 476 mijë e 469 pasagjerë, shifër kjo që paraqet një rritje prej 3.95 për qind në raport me korrikun e vitit 2025.

Rritje është shënuar edhe në numrin e fluturimeve. Gjatë këtij muaji janë realizuar 3 mijë e 352 fluturime, apo 4.82 për qind më shumë sesa në të njëjtën periudhë të vitit të kaluar.

Sipas aeroportit, këto shifra tregojnë për një rritje të qarkullimit të udhëtarëve dhe vazhdimësi të aktivitetit ajror gjatë sezonit veror.

“Pas çdo numri qëndrojnë njerëz, udhëtime, takime dhe histori të reja”, thuhet në njoftimin e aeroportit, i cili ka falënderuar pasagjerët dhe partnerët për bashkëpunimin.