Sot pritet vazhdimi i seancës për konstituimin e Kuvendit, afati kushtetues përfundon sot

Sot përfundon afati i paraparë me Kushtetutë për konstituimin e Kuvendit të Kosovës, ndërsa ende nuk është bërë e ditur zyrtarisht se në cilën orë do të vazhdojë seanca konstituive e ndërprerë një ditë më parë, përcjell albinfo.ch.

Seanca u ndërpre me kërkesë të kryetarit të Lëvizjes Vetëvendosje, Albin Kurti, i cili kërkoi kohë shtesë për të zhvilluar bisedime me përfaqësuesit e partive parlamentare, me synimin për të arritur një marrëveshje politike, veçanërisht rreth çështjes së presidentit.

Kërkesa e Kurtit u kundërshtua nga deputetët e Partisë Demokratike të Kosovës, të cilët reaguan ndaj ndërprerjes së seancës. Megjithatë, kryesuesi i seancës, Avni Dehari, vendosi t’i ndërpresë punimet.

Para ndërprerjes, Kuvendi arriti të përfundojë dy pikat e para të rendit të ditës: formimin e Komisionit të Përkohshëm për Verifikimin e Mandateve dhe betimin e deputetëve të legjislaturës së re.

Pas miratimit të raportit të komisionit, të gjithë deputetët e zgjedhur, përfshirë edhe deputetët e Listës Serbe, dhanë betimin dhe morën zyrtarisht mandatin e tyre.

Vazhdimi i seancës pritet të jetë vendimtar për zgjedhjen e kryetarit të Kuvendit dhe përfundimin e procesit të konstituimit të legjislaturës së 11-të. /Albinfo.ch