Ekstradohet nga Spanja në Kosovë i kërkuari për vrasje në tentativë

Shtetasi kosovar ishte arrestuar nga autoritetet spanjolle në bazë të një urdhërarresti ndërkombëtar të lëshuar përmes INTERPOL-it dhe tashmë u është dorëzuar autoriteteve në Kosovë.

Një shtetas i Kosovës, i kërkuar me urdhërarrest ndërkombëtar për veprën penale “vrasje e mbetur në tentativë”, është ekstraduar nga Spanja në Kosovë, transmeton albinfo.ch.

Lajmin e ka bërë të ditur Policia e Kosovës, e cila njoftoi se ekstradimi është realizuar më 6 gusht 2026, në bashkëpunim me autoritetet spanjolle dhe institucionet e drejtësisë.

“Policia e Kosovës, përkatësisht Drejtoria për Bashkëpunim Ndërkombëtar Policor, në koordinim dhe bashkëpunim me njësitet tjera relevante të Policisë së Kosovës dhe institucionet e drejtësisë, me datën 06.08.2026 ka bërë ekstradimin e shtetasit kosovar nga Spanja për në Kosovë”, thuhet në njoftimin e Policisë.

Sipas Policisë, i dyshuari ishte arrestuar nga autoritetet spanjolle pasi kërkohej përmes INTERPOL-it, në bazë të një letër-rreshtimi ndërkombëtar të lëshuar nga institucionet e drejtësisë së Kosovës.

Autoritetet bëjnë të ditur se ekstradimi është realizuar në përputhje me legjislacionin në fuqi dhe si rezultat i bashkëpunimit ndërmjet institucioneve të Kosovës dhe Spanjës.

Pas mbërritjes në Kosovë, i dyshuari u është dorëzuar njësive kompetente të Policisë së Kosovës në Rajonin e Prishtinës për zhvillimin e procedurave të mëtejshme ligjore.

Policia e Kosovës theksoi se do të vazhdojë bashkëpunimin me institucionet vendore, shtetet partnere dhe organizatat ndërkombëtare, me qëllim të parandalimit, hetimit dhe zbulimit të veprimtarive kriminale, si dhe gjurmimit dhe arrestimit të personave të kërkuar brenda dhe jashtë vendit./Albinfo.ch

---