4 fakte që ndoshta nuk i dini për 1 Gushtin në Zvicër

Sa dini për 1 Gushtin? Katër fakte interesante për Ditën Kombëtare të Zvicrës

Livadhi i Rütlit, me pamje mbi Liqenin e Lucernit, konsiderohet vendlindja simbolike e Zvicrës dhe një nga vendet më të rëndësishme historike të vendit, transmeton albinfo.ch.

Sipas traditës, në vitin 1291, përfaqësuesit e kantoneve Uri, Schwyz dhe Unterwalden u mblodhën në këtë vend për të bërë betimin e aleancës, një ngjarje që konsiderohet si miti themelues i Konfederatës Zvicerane dhe simbol i unitetit, lirisë dhe pavarësisë.

Çdo vit, më 1 gusht, qytetarë dhe përfaqësues të institucioneve mblidhen në Rütli për të shënuar Ditën Kombëtare të Zvicrës dhe për të nderuar origjinën e Konfederatës.

Megjithatë, 1 gushti nuk u bë festë zyrtare federale deri në vitin 1994. Në një referendum mbarëkombëtar të mbajtur në vitin 1993, 83.8 për qind e votuesve mbështetën shpalljen e kësaj date si festë publike në të gjithë Zvicrën.

Interesant është fakti se Karta Federale e vitit 1291 nuk përmend datën 1 gusht. Dokumenti mban vetëm shënimin se është hartuar “në fillim të gushtit”, ndërsa vetëm gjatë shekullit të 19-të u vendos që 1 gushti të shërbente si datë simbolike për përkujtimin e paktit themelues.

Përveç festimeve në Zvicër, edhe ambasadat, konsullatat dhe klubet zvicerane në mbarë botën organizojnë aktivitete me koncerte, fjalime, gatime tradicionale dhe ngritje të flamurit. Në shumë vende, këto aktivitete zhvillohen disa ditë ose javë para apo pas 1 gushtit, për t’u mundësuar pjesëmarrjen sa më shumë qytetarëve zviceranë që jetojnë jashtë vendit. /Albinfo.ch

---