135 futbollistë e futbolliste nga diaspora morën pjesë në kampet e FFK-së

Djem dhe vajza nga diaspora morën pjesë në kampet zhvillimore të FFK-së, ndërsa më të dalluarit do të ftohen në grumbullimet e ardhshme të kombëtareve të Kosovës.

Federata e Futbollit e Kosovës ka përmbyllur me sukses kampet zhvillimore me talentet e diasporës, duke bërë bashkë 135 futbollistë e futbolliste me një synim të përbashkët – afrimin e tyre me fanellën e Kosovës, transmeton albinfo.ch.

Përzgjedhja dhe vlerësimi i talenteve u zhvillua gjatë 10 ditëve, ndërsa FFK falënderoi të gjithë pjesëmarrësit dhe njoftoi se kampi i radhës do të organizohet në muajin gusht.

Në kuadër të kampit treditor të Kombëtares U17 të Kosovës, nën drejtimin e përzgjedhësit Arbnor Morina dhe stafit të tij, morën pjesë 35 futbollistë të gjeneratës 2010.

Që në ditën e parë, futbollistët u dalluan për entuziazmin, motivimin dhe përkushtimin e tyre, duke shfrytëzuar çdo seancë stërvitore për të dëshmuar cilësitë dhe potencialin e tyre.

Gjatë dy ditëve pasuese, stafi teknik pati mundësinë të vlerësojë nga afër aftësitë e secilit futbollist, ndërsa më të spikaturit do të ftohen në grumbullimet e ardhshme të Kombëtares U17.

Me sukses u përmbyll edhe kampi treditor i Kombëtares U17 të vajzave, ku morën pjesë 29 futbolliste të gjeneratave 2010, 2011 dhe 2012, nën drejtimin e përzgjedhëses Sanije Krasniqi, transmeton tutje albinfo.ch.

Gjatë tri ditëve të kampit, lojtaret zhvilluan stërvitje intensive dhe kampi u mbyll me një ndeshje kontrolluese, e cila i shërbeu stafit teknik për të bërë vlerësimin përfundimtar të secilës futbolliste.

Sipas FFK-së, futbollistet që u dalluan me paraqitjet e tyre do të mbeten pjesë e planeve të kombëtareve të grupmoshave U15 dhe U17, duke hedhur një hap të rëndësishëm drejt përfaqësimit të Kosovës në arenën ndërkombëtare. /Albinfo.ch

---