VW do të tkurret deri në vitin 2030

Do të prodhohen vetëm nëntë milionë makina në vit nga aktualisht dhjetë milionë në vit. Pritet të shkurtohen rreth 35.000 vende pune vetëm në Gjermani

Menaxhmenti i prodhuesit gjerman të makinave VW është takuar të enjten për të diskutuar se si të vazhdohet me kompaninë e cila prej kohësh ndodhet në vështirësi.

Në këtë takim u vendos që VW të tkurret deri në vitin 2030, transmeton albinfo.ch. Në të ardhmen, do të prodhohen vetëm nëntë milionë makina në vit. Aktualisht, shifra është rreth dhjetë milionë në vit, njoftoi VW.

Numri i modeleve të makinave të ofruara do të reduktohet deri në 50 për qind, dhe opsionet e pajisjeve për makinat gjithashtu do të shkurtohen.

VW nuk ka komentuar mbi ndikimin e këtyre masave tek punonjësit.

Mediat gjermane kishin raportuar më parë se dhjetëra mijëra vende pune mund të humbasin.

Sipas gazetës “Die Zeit” do të preken fabrikat në Hanover, Emden, Zwickau dhe Neckarsulm. Volkswagen nuk i ka konfirmuar ende këto vende.

Sipas transmetuesit publik austriak (ORF), deri në 100,000 vende pune mund të humbasin në të gjithë botën. Kjo do të ishte dukshëm më shumë vende pune sesa është planifikuar aktualisht nga kompania.

Masat e VW për uljen e kostove shkaktojnë konflikt me Saksoninë e Poshtme

Që në fund të vitit 2024, bordi dhe përfaqësuesit e punonjësve ranë dakord për shkurtimet e vendeve të punës. Sipas gazetës “Die Welt”, këto shkurtime përfshijnë rreth 35,000 vende pune në Gjermani.

Ministri-President i Saksonisë së Poshtme, Olaf Lies, foli qartë kundër mbylljes së fabrikave. Siç raporton gazeta “Die Zeit”, mbylljet nuk janë një strategji e qëndrueshme në të ardhmen për Volkswagen.

---