Gjermani: Sulm me armë dhe thikë në një shkollë në Bavari, raportohet për disa të plagosur

(KEYSTONE/DPA/David Inderlied)

Një ngjarje e rëndë ka tronditur sot Gjermaninë, ku disa persona kanë mbetur të plagosur si pasojë e një sulmi të dhunshëm në një shkollë të mesme (gjimnaz) në qytetin Schongau të Bavarisë. Policia lokale ka bërë të ditur se autori i dyshuar i sulmit është arrestuar menjëherë pas ngjarjes.

​Sipas informacioneve të para nga autoritetet gjermane, sulmi ka ndodhur në ambientet e shkollës “Welfen Gymnasium”. Përmes një njoftimi zyrtar në rrjetin social X, policia bavareze konfirmoi arrestimin e një të dyshuari 16-vjeçar. Raportohet se dy vajza 13-vjeçare kanë marrë plagë të rënda dhe janë transportuar me urgjencë në spital, teksa numri total i të lënduarve mbetet ende nën hetim, transmeton albinfo.ch.

​”Në këto momente, dimë që disa persona janë lënduar në gjimnazin Welfen. Një i dyshuar është ndaluar”, deklaroi policia, duke i bërë thirrje qytetarëve të shmangin zonën përreth shkollës për të lejuar operacionin e forcave të sigurisë.

​Ndërhyrja e forcave të emergjencës

​Një numër i madh policësh dhe ekipesh mjekësore, përfshirë gjashtë helikopterë të ndihmës së shpejtë, janë dislokuar në vendngjarje. Për prindërit dhe të afërmit e nxënësve, autoritetet kanë ngritur një pikë pritjeje dhe asistence psikologjike në stacionin e zjarrfikësve të qytetit, i cili ndodhet më pak se 100 kilometra në jugperëndim të Mynihut.

​Hetimet fillonare sugjerojnë se adoleshenti ka qenë i pajisur me një thikë dhe një armë zjarri, ndërsa motivet e këtij akti mbeten ende të paqarta. Policia po heton nëse bëhet fjalë për një sulm të qëllimshëm të tipit “Amok” (sulm i tërbuar ndaj personave të rastësishëm) apo për një konflikt personal.

​Sulmet në shkollat gjermane, një shqetësim në rritje

​Gjermania është përballur me disa sulme të ngjashme në institucionet arsimore dhe hapësirat publike gjatë viteve të fundit.

​Incidenti më i fundit i ngjashëm në një ambient shkollor ndodhi në shtator të vitit 2025, kur një 17-vjeçar me origjinë kosovare plagosi rëndë me thikë një mësuese 45-vjeçare në një shkollë profesionale në qytetin Essen. Sipas prokurorisë së asaj kohe, sulmi kishte motive xhihadiste, ndërsa i dyshuari kishte sulmuar gjithashtu rojen e një shkolle fillore dhe një kalimtar të rastësishëm në rrugë.