Glamour Magazine: Rita Ora themelon shkollë arti në Kosovë

Këngëtarja me famë botërore Rita Ora në një intervistë për Glamour Magazine ka bërë të ditur se ka në plan për të ngritur një shkollë arti në Kosovë.

Në numrin e muajit shtator ku Rita është edhe në ballinën e kësaj reviste, në një intervistë që ka dhënë ajo është shprehur se në partneritet me UNICEF-in, ka një plan afatgjatë për të ngritur një shkollë të arteve skenike në Kosovë duke iu referuar Kosovës si një vend që është ende i trazuar pas luftërave ballkanike në vitet e 90.

Shkolla skenike ka të bëjë me format e artit në të cilën artistët përdorin zërin e tyre apo edhe lëvizjet e trupit që përfshijnë vallëzimin, muzikën, operën, teatrin, pantomimën, teatrin e kukullave, recitimin.

Këngëtarja nuk heziton asnjëherë të përmend prejardhjen e saj nga Kosova, duke e promovuar kështu shtetin tonë, Kosovën.

Ajo, muaj më parë ka marrë titullin “Ambasadore nderi e Kosovës në botë”, titull që i është dhënë nga presidentja e vendit.
Rita ka paralajmëruar se së shpejti do ta ketë gati edhe një këngë me titull “Kosovo”.