Ylli shqiptar i CS2, Drin “Makazze” Shaqiri kampion i ESL Pro League

Ylli shqiptar i esports u shpall edhe MVP i turneut pasi udhëhoqi Natus Vincere drejt fitores 3:1 ndaj Aurora Gaming në finalen e ESL Pro League në Counter‑Strike 2

Lojtari shqiptar i esports, Drin Shaqiri, i njohur me nofkën “Makazze”, ka shkruar histori në skenën ndërkombëtare të lojërave elektronike, pasi u shpall kampion i turneut prestigjioz ESL Pro League në lojën Counter‑Strike 2, transmeton albinfo.ch.

Ai triumfoi me ekipin e tij Natus Vincere (NaVi), i cili në finalen e madhe mposhti ekipin Aurora Gaming me rezultat 3:1 në mape.

“Makazze” ishte një nga lojtarët më të spikatur të finales, duke zhvilluar një performancë të jashtëzakonshme dhe duke kontribuar në mënyrë vendimtare në suksesin e skuadrës së tij. Paraqitjet e tij të nivelit të lartë gjatë gjithë turneut i siguruan edhe çmimin MVP (Lojtari më i mirë i turneut).

Me këtë arritje historike, Drin “Makazze” Shaqiri bëhet lojtari i parë shqiptar që fiton një trofe të ESL Pro League dhe njëkohësisht i pari që shpallet MVP në një turne të këtij niveli në skenën botërore të Counter-Strike.

Triumfi i tij me Natus Vincere konsiderohet një moment historik për komunitetin shqiptar të esports, duke dëshmuar se talentet shqiptare po arrijnë të depërtojnë dhe të shkëlqejnë në arenën më të madhe ndërkombëtare të lojërave elektronike. /Albinfo.ch

---