Ndërmjetësuesit të dialogut Kosovë-Serbi i zgjatet mandati edhe për dy vjet

Ndërmjetësuesi i dialogut Kosovë-Serbi, Peter Sorensen, do të jetë në këtë pozitë edhe për dy vjet.

Sorensen do të vazhdojë edhe për së paku dy vjet si i dërguar i posaçëm i Bashkimit Evropian për dialog mes Kosovës dhe Serbisë, teksa për këtë janë pajtuar tashmë vendet anëtare dhe pritet që në javët në vijim kjo gjë vetëm të formalizohet. Mësohet kjo nga burimet diplomatike në Bruksel, të cilat thonë se paralelisht Këshilli i BE-së duhet edhe të miratojë buxhetin për punën e ekipit të Sorensenit. Për vazhdimin e mandatit të Sorensenit propozimin e kishte dhënë sipas procedurave Përfaqësuesja e Lartë për politikë të jashtme dhe siguri Kaja Kallas dhe me këtë, pas disa diskutimeve në strukturat e Këshillit, janë pajtuar vendet anëtare.

Mandati i tij skadon në muajin shkurt, pasi ai fillimisht ishte emëruar në këtë post për vetëm 13 muaj.

Gjatë vitit të parë të mandatit të Sorensen në postin e të dërguarit të posaçëm për dialog nuk ka pasur fare takime në nivel të lartë, ndërsa takimet në nivel të kryenegociatorëve nuk kanë prodhuar asnjë progres. Ato takime janë shfrytëzuar vetëm për të shkëmbyer akuzat e palëve ndaj njëra-tjetrës, ndërsa BE-ja vetëm ka shprehur pakënaqësi për mungesën e vullnetit të palëve për të kryer obligimet e tyre.

Për mungesë të progresit në dialog, BE-ja kësaj radhe shkakun e gjen te situata e brendshme politike si në Kosovë ashtu edhe në Serbi. Por edhe në këto kushte thonë se Përfaqësuesja e Lartë, Kaja Kallas, mbetet e gatshme të organizojë një takim të nivelit të lartë sapo palët të jenë të gatshme për këtë. Por kjo nuk pritet të ndodhë para se të përmbyllet procesi i zgjedhjeve të reja në Kosovë dhe të themelohet qeveria pas tyre.