KQZ: Përmbyllet procesi i tërheqjes së pakove me fletëvotime nga jashtë vendit

Komisioni Qendror i Zgjedhjeve ka njoftuar se të martën është përmbyllur procesi i tërheqjes së pakove me fletëvotime të dërguara përmes postës nga shtetasit e Kosovës që jetojnë jashtë vendit, në kuadër të Zgjedhjeve Lokale 2025 për Kryetarë të Komunave dhe Kuvende Komunale.

Tërheqja e pakove është bërë nga kutitë postare të KQZ-së në 22 shtete të ndryshme si dhe nga kutia postare e KQZ-së në Kosovë.

Sipas të dhënave zyrtare, janë tërhequr gjithsej 33,841 pako të supozuara me fletëvotime. Këto pako, pas mbërritjes në Kosovë, do t’i nënshtrohen procesit të vlerësimit dhe numërimit në Qendrën e Numërimit dhe Rezultateve.

Gjatë periudhës së regjistrimit, numri i shtetasve të regjistruar për të votuar përmes postës ka qenë 43,933. Votimi nga jashtë kishte filluar më 17 shtator dhe është përmbyllur më 11 tetor 2025.

KQZ ka theksuar se ky është një hap i rëndësishëm drejt finalizimit të procesit zgjedhor, duke siguruar që çdo votë e dërguar nga jashtë të trajtohet sipas procedurave ligjore dhe me transparencë të plotë.