Kosovë: Një muaj paraburgim për policin e dyshuar për spiunazh

Foto sc FB

Gjykata Themelore në Prishtinë i ka caktuar një muaj paraburgim policit Bojan Jevtiq, i dyshuar për veprën penale të spiunazhit.

Gjykata pas mbajtjes së seancës dëgjimore, vlerësoi se caktimi i masës së paraburgimit në këtë çështje penale është masë adekuate sepse nëse i pandehuri lihet në liri, ekziston rreziku i ikjes, mund t’i shmanget procedurës penale dhe se i njëjti do të jetë i pakapshëm për organet e drejtësisë, duke qenë se ai dyshohet për vepër penale të një rrezikshmërie shumë të lartë, transmeton albinfo.ch.

Bëhet e ditur se Gjykata Themelore ka vlerësuar që nëse i pandehuri lihet në liri, i njëjti mund të ndikojë në prova dhe në dëshmitarë si dhe mund të përsërisë veprën e njëjtë penale ose mund të kryejë sërish vepra tjera penale në rrethana të njëjta ose më të rënda, thuhet në njoftimin e gjykatës.