Agim Çeku dhe 9 të tjerë dënohen me nga 1 vit burg për rastin “Veteranët”

Gjykata Themelore në Prishtinë ka shpallur vendimin për rastin e njohur si “Veteranët”, ku dhjetë persona janë dënuar me nga një vit burg për keqpërdorim të detyrës zyrtare, ndërsa dy të tjerë janë liruar nga akuzat.

Të dënuarit janë:

Agim Çeku (ish-kryeministër)
Rrustem Berisha (ish-ministër i Mbrojtjes)
Shkumbin Demaliaj (ish-deputet)
Sadik Halitjaha
Qelë Gashi
Shukri Buja
Ahmet Daku
Faik Fazliu
Fadil Shurdhaj
Xhavit Jashari

Ndërsa të liruar nga akuzat janë:

Nuredin Lushtaku
Smajl Elezaj

Sipas aktakuzës, ata kanë keqpërdorur pozitën e tyre zyrtare gjatë viteve 2011-2017 si anëtarë të Komisionit Qeveritar për Njohjen dhe Verifikimin e Statusit të Veteranëve të UÇK-së, duke i shkaktuar buxhetit të Kosovës dëm në vlerë prej 88.7 milionë eurosh përmes përfshirjes së personave që nuk e meritonin statusin.

Fillimisht, në prill të vitit 2021, Gjykata Themelore i kishte liruar të gjithë nga akuzat, por Gjykata e Apelit e ktheu rastin në rigjykim në vitin 2022. Sot, vendimi përfundimtar ka sjellë dënimin e dhjetë prej tyre me nga një vit burg.