Alarmohet BE: Paketë masash për të lehtësuar krizën e emigrantëve

Liderët evropianë shprehën shqetësimin për valën në rritje të emigrantëve aziatikë dhe afrikanë që po përpiqen të hyjnë në vendet e Bashkimit Evropian. Tashmë është publikuar një paketë masash në përpjekje për të lehtësuar krizën e emigrantëve që ka përfshirë vendet e Mesdheut.

Ekipet e patrullimit “Triton” do të përforcohen dhe me një mandat ushtarak për shkatërrimin e anijeve të trafikantëve. Ndërkohë, një samit i jashtëzakonshëm i krerëve të vendeve të BE-së do të mbahet ditën e enjte.

BE është alarmuar pasi një barkë u përmbyt në brigjet e Libisë me mbi 700 emigrantë që mendohet të kenë humbur jetën, derisa lundronin drejt ishullit Lampedusa në Itali.
Për shefen e Politikës së Jashtme të BE-së, Federica Mogherini, paketa me 10 masa, e publikuar në një tryezë bisedimesh në Luksemburg, është një reagim i fuqishëm ndaj tragjedive dhe tregon ndjeshmërinë e tij ndaj këtij problemi.

Viktimat e fundit e çojnë në më shumë se 1.500 numrin e të mbyturve në Mesdhe gjatë këtij viti, në krahasim me rreth 90 në të njëjtën periudhë një vit më parë.
Italia ngul këmbë se partnerët e saj të Bashkimit Evropian nuk kanë bërë sa duhet për ta ndihmuar në krizën e emigrimit.

Italia ka mbajtur pjesën më të madhe të barrës për shpëtimin dhe strehimin e emigrantëve. Vitin e kaluar Italia i dha fund misionit “Mare nostrum” të kërkim-shpëtimit, i cili u zëvendësua nga një mision i vogël, i drejtuar nga Bashkimi Evropian.