Deputetët nga Kosova dhe Zvicra takohen në kuadër të ‘Grupit të Miqësisë’

Grupi i Miqësisë Kosovë-Zvicër, realizoi vizitën me grupin homolog nga radhët e Parlamentit të Zvicrës

Zvicra është një shtet mik, që ka treguar mbështetje të plotë e të pakursyer si në aspektin politik, ashtu dhe atë ekonomik.

‘Lidhjet dhe afërsia në mes të Kosovës dhe Zvicrës nuk janë ndërtuar vetëm me themelimin e marrëdhënieve diplomatike në mes të dy shteteve, por një faktor i rëndësishëm në këtë drejtim është diaspora jonë, ku tanimë është shtëpi për mbi 200,000 qytetarë nga Kosova’, tha kryetarja e grupit të miqësisë Kosovë-Zvicër, deputetja Jeta Statovci, shkruan Albinfo.ch.

Ajo sqaroi se çfarë është diskutuar në takimin e parë të këtij grupi.

Njoftimi i deputetes Statovci:

Si kryetare e grupit të miqësisë, së bashku me delegacionin, kemi veçuar për të diskutuar me palën homologe:

– Marrjen e hapave konkretë për marrëveshje të tregtisë së lirë në mes të vendeve të EFTA-s dhe Kosovës. Kjo marrëveshje është e rëndësisë së veçantë, duke pasur në dijeni faktin që Kosova ka bilanc pozitiv tregtar me Zvicrën- eksportet e mallrave në vitin 2021 arritën në 56 milionë euro, ndërsa vlera e mallrave të importuara arrin shifrën prej 31.2 milionë euro.

Kosova deri më tani mbetet i vetmi shtet në rajon pa një marrëveshje të tillë.

– Zvicra është shtëpi për një numër të madh të organizatave ndërkombëtare. Delegacioni potencojë objektivat dhe synimet e shtetit të Kosovës, sidomos në raport me Këshillin e Evropës, dhe na u bë i qartë pozicioni pozitiv i Zvicrës në këtë aspekt.

– Trajtuam temën mbi sistemin dual të arsimimit, ku Zvicra është adresa ideale për të mësuar prej tyre, si dhe mundësinë e vizave sezonale, të cilat do të reflektonin në shumë aspekte të zhvillimit socio-ekonomik për vendin tonë.

Në cilësinë e Kryetares së Grupit të Miqësisë pata kënaqësinë të zhvilloj takim me Presidentin e Federates së Futbollit në Zvicër.

Në këtë takim ishin prezent edhe drejtuesit e Federatës së Futbollit të Kosovës. Diaspora jonë ka arritur suksese të jashtëzakonshme në gjithë sferat, e sidomos në sport. Talenti që buron nga një vend kaq i vogël, mahnit të gjithë.

Takime zhvilluam edhe me përfaqësues shoqatash dhe afaristë në Cyrih. Diaspora jonë, dhe ndërlidhja e jashtëzakonshme me mërgatën tonë, vazhdon të jetë një katalizator i fuqishëm për shumë procese. Ndihma e tyre e pakusht, sidomos ekonomike, vazhdon të jetë një shtytje e madhe për ekonominë e Kosovës. Mirëpo, aty u theksua edhe nevoja për investime direkte në mënyrë që të rritet produktivitetit i vendit, duke nxitur qarkullim sa më të madh ekonomik.

LINK

---