Opozita në Mal të Zi heq dorë nga rrëzimi i qeverisë

Bëhet e ditur se partitë opozitare në Mal të Zi hoqën dorë nga iniciativa për të votuar mocionin e mosbesimit ndaj Qeverisë së Zdravko Krivokapiq.

Opozita gjatë tërë kohës pohonte se për këtë iniciativë ka 41 deputetë, nga 81 sa numëron Parlamenti i Malit të Zi, por siç duket, nuk ia doli të sigurojë një votë nga partitë në pushtet, megjithëse nga këto të fundit u akuzua se ka zhvilluar bisedime të fshehta.

Sipas opozitës të kryesuar nga Partia Demokratike e Socialistëve e Presidentit Millo Gjukanoviq, ,,Arsyeja për tërheqje të nismës, ishte paralajmërimi i partisë në pushtet, Fronti Demokratik proserb, i cili ka paralajmëruar se do të dorëzojë iniciativën për shkurtimin e mandatit të Parlamentit.

Fronti Demokratik thotë se do të kërkojë dhe organizimin e zgjedhjeve të jashtëzakonshme, mirëpo “këtë propozim nuk e kanë pranuar partnerët e koalicionit qeverisës” dhe se Fronti nuk ka numrin e duhur për jetësimin e kësaj nisme.

Kryeministri Krivokapiq: Dështimi i mocionit të mosbesimit fitore e qeverisë

I menjëhershëm ka qenë reagimi i kryeministrit Zdravko Krivokapiq. Pas dështimit të mocionit të mosbesimit ai në një konferencë shtypi tha, se tërheqja e opozitës është fitore për qeverine që ai udhëheq. “Kjo është loja e atyre që tentuan që me korrupsionin politik të fitojnë vota”. Kryeministri ka thënë po ashtu se Partia Demokratike e Socialistëve ka shpenzuar 20 milionë euro në tentativë për të rrëzuar qeverinë.

Kryeministri i Malit të Zi ka thënë po ashtu se qeveria do të japë dorëheqje në fund të qershorit të vitit 2022, nëse nuk realizohet buxheti. Ndërsa në Parlament vazhdojnë akuzat e ndërsjella ndërmjet opozitës dhe partive të koalicionit qeverisës dhe në rradhët e vetë koalicionit, kriza politike në Mal të Zi thellohet gjithnjë e më shumë. Qytetarët po ashtu janë të pakënaqur me punën e qeverisë./DW