Opinione

Konciziteti dhe qartësia e Vjosa Osmanit dhe maturia e Albin Kurtit

Vjosa ishte koncize dhe e qartë në përgjigjet e saj. Albini tregoi maturi më të madhe se çdo herë tjetër. Ishte i përmbajtur në klasifikimin e rivalëve të tij...

E diel, 14 Shkurt 2021 - 11:20 Nexhmedin Gerguri

Keystone

Në emisionin «Debat Plus» të TV Dukagjinit, më 12 shkurt pyetjeve të panelit intervistues iu përgjigjën Vjosa Osmani dhe Albin Kurti.

Vjosa ishte koncize dhe e qartë në përgjigjet e saj. Albini tregoi maturi më të madhe se çdo herë tjetër. Ishte i përmbajtur në klasifikimin e rivalëve të tij dhe edhe më i përmbajtur në shpalosjen e strategjisë dhe taktikave në marrëdhëniet me Serbinë dhe ndërkombëtarët përgjithësisht. I mësuar nga pësimi i fundit, kur partneri hileqar ia shfrytëzoi sinqeritetin, Albini këtë herë strategjinë e ruajti në mënyrë strategjike: atë nuk e shpalosi tash për të pasur pengesa në realizim, por atë e ruajti për t’ia parë sukseset gjatë realizimit.

Kjo sjellje e matur e Albin Kurtit e zbeh pakëz entuziazmin e masave, por kurrsesi jo deri në atë pikë sa ta ndërrojë përcaktimin për të.

Pasurim i jashtëzakonshëm i platformës së Kurtit është Vjosa Osmani. Me të si Presidente e vendit apo edhe Ministre e Punëve të Jashtme, Kosova në vitet e ardhshme po fiton një dimension të ri të rëndësishëm jo vetëm të stabilitetit qeverisës, por edhe të një vizioni të qartë të ecjes së vendit përpara.

Lista e saj sigurisht që do të pësojë edhe ndryshime dhe plotësime dhe platforma e saj do të zgjerohet dhe do të pasurohet, por përcaktimi saj pro kursit të ndërtuar bashkërisht me Albin Kurtin më 2019 ishte më se i duhur dhe më se i rëndësishëm për vendin.

Edhe nëse platforma e saj politike ideologjikisht nuk përputhet me atë të Albin Kurtit, kursi i saj i tashëm politik ishte më se i zgjuar dhe më se atdhetar. Një kurs i saj tjetër ideologjik në të ardhmen, duke ruajtur atë që është bazënisje – gatishmërinë për të qëndruar mbi ideologjinë në mbrojtje të interesave të vendit, është një pasuri për realitetin politik të Kosovës dhe të marrëdhënieve të saj me jashtë.

Edhe kreu i ri i PDK-së, me bagazhin e tij solid akademik dhe intelektual, ka arritur t’i japë një petk të ri PDK-së, të cilën, nëse arrin ta udhëheqë pa ndikimet e grupeve te interesave të PDK-së dhe derivateve të saj, duket se PDK-së nuk do t’ia ndryshojë vetëm petkun, por edhe karakterin e saj të vënë dukshëm në pyetje këto vitet e fundit.

Të shpresojmë se përgjigjet që do të marrin nga elektorati do ta transformojnë edhe partitë konservatore LDK-në dhe AAK-në. Nisma në këtë përbërje që është duket se ashtu- kështu po e shënon fundin e saj.

Tandemi i ri udhëheqës Kurti – Osmani dhe herrja politike që elektorati do t’u bëjë krerëve të LDK-së, AAK-së dhe të Nisma-s janë shpresa e një fillimi të ri të Kosovës.

Të shpresojmë se ashtu siç po bëhet realitet Vjosa Osmani sie një shpresë e Kosovës siç e pata quajtur në një shkrim timin me titullin “Shpresa e quajtur Vjosa Osmani” të botuar në Albinfo më 30.5.2015, kur ajo kandidonte për kryetare të LDK-së, edhe ky konstatim të bëhet realitet që pas datës së 14 shkurtit 2021 – Ditës së Dashurisë ndaj Kosovës!