Kosova

VV-ja hedh hapa për votimin e mërgatës në ambasada dhe konsullata

E hënë, 8 Qershor 2020 - 17:40 albinfo.ch

Sot, një grup i deputetëve të Lëvizjes Vetëvendosje ka proceduar nismën ligjore për ndryshimin dhe plotësimin e Ligjit për Zgjedhje të Përgjithshme, përmes të cilit iu mundësohet bashkatdhetarëve që të përmbushin të drejtën e tyre kushtetuese për të votuar në ambasada dhe konsullata të Republikës së Kosovës, bëhet e ditur përmes një komunikate për media.

“Mërgata përbën më shumë se 1/3 e popullsisë së tërësishme në Kosovë. Roli dhe kontributi i bashkatdhetarëve ka qenë dhe vazhdon të jetë shumë i rëndësishëm në jetën ekonomike dhe sociale e politike në Kosovë. Rreth 700 milionë euro në vit vijnë nga mërgata. Fatkeqësisht dhe jo për fajin e saj, roli politik i mërgatës është reduktuar shumë kur bëhet fjalë përfshirjen e tyre në vendimmarrje”, thuhet në komunikatë, transmeton koha.net, përcjell albinfo.ch.

Megjithëse, thuhet tutje në komunikatë, formalisht mundësia e pjesëmarrjes në zgjedhje ju njihej, praktikisht atyre iu është pamundësuar përmes burokracisë e pengesave teknike e administrative.

“Mospërputhja e numrit të madh të bashkatdhetarëve, kontributit politik, kombëtar dhe ekonomik të tyre dhe përfshirjes në zgjedhje, duhet të marrë fund, duke u ofruar mundësi që të votojnë aty ku jetojnë, në ambasada dhe konsullata të Republikës së Kosovës”, thuhet në komunikatën e VV-së.

Me projektligjin e propozuar nga deputetët e Lëvizjes Vetëvendosje votuesit nga mërgata do ta kenë mundësinë që të realizojnë të drejtën e tyre kushtetuese që të votojnë në ambasadat dhe konsullatat e Republikës së Kosovës në vendet ku jetojnë.

 Të ngjashme

Privilegj apo sfidë? Një brez mes rrënjëve dhe horizonteve të reja

 Të tjera nga Kosova

Dorëzohen mbi 150 nënshkrime për Kuvend të jashtëzakonshëm në LDK, synohet shkarkimi i Abdixhikut

 E-Diaspora

 Jeta në Austri