“Klithma”, shpërblehet në Bosnjë e Hercegovinë

“Filmi “Klithma” është një film i mrekullueshëm, me një temë serioze, veçanërisht për popujt e Ballkanit”, ka deklaruar Alen Drljević, regjisor nga Bosnja/anëtar i jurisë, të cilën e përcjellë për telegrafi.com, drejtori i fotografisë së filmit “Klithma”, Almir Djikoli

Filmi i shkurtër kosovar “Klithma”, në regji të Korab Lecajt, është shpërblyer me çmimin “BEST CINEMATOGRAPHY” në konkurrencën e filmave të shkurtër, të cilën e ndan çdo vit Asociacioni i Kinematografëve të Bosnjë e Hercegovinës.

Lajmin e ka bërë të ditur për telegrafi.com regjisori Korab Lecaj.

“Sapo e kemi marrë një lajm të madh për filmin tonë. E vlerësoj shumë këtë çmim për faktin se Asociacioni i Kinematografëve të Bosnjës dhe Hercegovinës është një Asociacion me reputacion jo vetëm në Bosnjë e Hercegovinë, por në të gjithë vendet e ish-Jugosllavisë”, ka thënë regjisori Lecaj.

Ndërsa drejtori i fotografisë së filmit “Klithma”, të cilit i është ndarë çmimi në Sarajevë, Almir Djikoli, ka thënë se është i gëzuar për këtë vlerësim të Asociacionit të Kinematografëve të Bosnjë e Hercegovinës.

“Unë kam marrë shumë vlerësime të mira për fotografinë dhe në përgjithësi për filmin “Klithma”, nga anëtarët e jurisë”, ka thënë Djikoli.

Ai ka veçuar deklaratën e regjisorit të njohur boshnjak, Alen Drljević, i cili ka qenë anëtar i jurisë. “Filmi “Klithma” është një film i mrekullueshëm, me një temë serioze, veçanërisht për popujt e Ballkanit”, ka deklaruar Alen Drljević, regjisor nga Bosnja/anëtar i jurisë, të cilën e përcjellë për telegrafi.com, drejtori i fotografisë Almir Djikoli.

Ndryshe, filmi “Klithma”, në regji të Korab Lecajt, skenarin e të cilit e kanë shkruar Korab Lecaj dhe Hazir Haziri, me producent Besar Zahitin, deri më tani është shpërblyer për “Best Short Film” në West Nordic Internatioal Film Festival në Norvegji, për “Montazhin më të mirë”, është shpërblyer në 7th Indian Cine Film Festival në Mumbai të Indisë, për “Skenarin më të mirë” është shpërblyer në festivalin “Hyjnesha në fron” në Prishtinë.

Filmi flet për pasojat psikologjike të burrave shqiptarë të dhunuar seksualisht gjatë luftës në Kosovë nga ushtria dhe policia serbe.

Në rolet kryesore luajnë: Hazir Haziri, Alban Zogaj, Arbnesha Grabovci-Nixha, Arjola Demiri, Kaltrinë Zeneli, Rajmonda Ahmetaj, shkruan telegrafi, përcjell albinfo.ch.

---