3 shqiptarë u arrestuan për falsifikim të dokumenteve italiane

3 shqiptarë me karta identeti italiane falso drejt shtetit Anglez

Policia ka bërë të ditur se janë arrestuar 3 shqiptarë me karta identeti italiane false, për të kaluar drejt Anglisë.

Në Rinas operacioni i koduar “Destinacioni final” ka bërë të mundur prangosjen e tre personave, të cilët nëpërmjet falsifikimit të dokumenteve dhe kundrejt përfitimeve financiare ndihmonin shtetas të ndryshëm për kalimin e paligjshëm të kufirit drejt Anglisë.

Në pranga përfunduan shtetasit me iniciale E. B., 33 vjeç, dhe E. Xh., 25 vjeç, të dy banues në Tepelenë, si dhe K. X., 19 vjeç, banues në Tiranë.

Po ashtu, gjatë kontrollit që iu bë këtyre personave nga Policia e Rinasit u gjetën dhe sekuestruan në cilësinë e provës materiale 3 karta identiteti dhe 3 karta shëndeti italiane të dyshuara si të falsifikuara.

Sipas raportit, thuhet se këta tre shtetas në bashkëpunim me persona të tjerë pasi kishin siguruar paraprakisht dokumente të falsifikuara italiane me gjeneralitete të shtetasve të tjerë (italianë), kanë tentuar të kalojnë nëpërmjet aeroportit të Rinasit tranzit drejt aeroportit të Milanos me destinacion final në Mbretërinë e Bashkuar.

Vijon puna për identifikimin e bashkëpunëtorëve që kanë pajisur këta shtetas më dokumente të falsifikuara dhe që do t’i ndihmonin për të kaluar në mënyrë të paligjshme drejt Britanisë së Madhe, përcjell albinfo.ch.

---