Përfundojnë me sukses “Kampionatet” në 70 profesione

Gjatë pesë ditëve sa ka zgjatur „Swiss Skills" në Bernë është vizituar nga 155 mijë veta.

Gjatë pesë ditëve të javës që shkoi janë mbajtur në Bernë 70 „kampionate” të profesioneve të ndryshme, ku shkathtësitë e tyre i kanë treguar 1000 pjesëmarrës. „Swiss Skills Bern”, siç është quajtur aktiviteti është mbajtur për herë të parë në mënyrë të centralizuar, për 70 profesione, në të njëjtin vend.

Të dielën ka përfunduar kjo veprimtari, me ç`rast janë ndarë medaljet për më të mirët. Gjatë pesë ditëve sa ka zgjatur „Swiss Skills”, është vizituar nga 155 mijë veta.

„Reaksionet e shumta pozitive, prezenca e madhe mediale dhe sidomos ajo e medieve sociale, bashkë me numrin e madh të vizitorëve tregojnë se koncepti i aktivitetit është i qëlluar”, thuhet në një komunikatë të bërë nga organizatorët.

Përveç medaljeve, tre më të mirët nga lëmenj të ndryshëm kanë siguruar edhe pjesëmarrjen në kampionatet përkatëse evropiane dhe botërore për të rinj, shkruan nzz.ch.

„Ajo çfarë kemi parë gjatë këtyre ditëve më bën krenar” ka thënë ministri i ekonomisë, Johann Schneider-Ammann në ceremoninë përmbyllëse të dielën. Me rezultatet e treguara, pjesëmarrësit janë ambasadorët më të mirë të arsimit dual profesional, ka thënë Ammann.