SVP/UDC: Ndihmat sociale, jo më shumë se 600 franga në muaj

Aktualisht shuma që rekomandohet në nivel nacional dhe që e aplikojnë shumica e komunave është mesatarisht 986 franga për muaj dhe person

Kohëve të fundit janë shpeshtuar raportimet në medie ku personat ose familjet që varen nga ndihmat sociale etiketohen për shpërdorim të parave të taksapaguesve. Në veçanti në thumb në këtë drejtim janë entet për ndihmë  sociale dhe firmat që ofrojnë këto shërbime.

Në ballë të kritikave kundër “industrisë sociale” siç quhet me termin pezhorativ veprimtaria e ndihmave sociale, është partia SVP/UDC. Së fundi kjo parti ka krijuar një grup pune i cili ka përpiluar një letër me kërkesa për t`i dhënë fund atyre që kjo parti i quan shpërdorime. Në këtë letër kërkohet më shumë autonomi e komunave për të vendosur rreth trajtimit të rasteve sociale shkruan gazeta “Tages Anzeiger” në numrin e sotëm.

Ndërsa kërkesa më eksplicite që vjen nga kjo letër është kufizimi i lartësisë së ndihmave sociale në maksimalisht 600 franga në muaj dhe person. Aktualisht shuma që rekomandohet në nivel nacional dhe që e aplikojnë shumica e komunave është mesatarisht 986 franga për muaj dhe person.

Ndihmat sociale sipas SVP/UDC-së në të ardhmen duhet të mundësojnë vetëm furnizimin me ushqim, veshmbathje, sigurimin e  kulmit mbi kokë dhe sigurimin bazik shëndetësor. Kjo nënkupton që të hiqet dorë edhe nga “minimumi ekzistencial” që e përcakton autoriteti nacional për ndihmat sociale.