Ekonomistët: Frëngjishtja para anglishtes

Frëngjishtja në ekonominë zvicerane ka një prioritet të lartë. Prandaj, është edhe nevojë që punëtorët e kompanive zvicerane të mësojnë si gjuhë të dytë një gjuhë të vendit

Për gati një muaj në Zvicër po zhvillohet debati se cilën gjuhë të huaj duhet ta mësojnë nxënësit në shkollat fillore të Zvicrës gjermane: frëngjishten ose anglishten. Për herë të parë ka marrë një vendim Parlamenti i Kantonit Thurgau dhe ka vendosur që frëngjishtja të jetë gjuha e dytë pas gjermanishtes. Pas Thurgaus, të njëjtën e kanë ndjekur kantonet Nidwalden dhe Lucern.

Në këtë debat janë përfshirë edhe ekonomistët zviceranë. Për gazetën “Aargauer Zeitung” shpjegon Hans-Ulrich Bigler, drejtor i Unionit për punësim.

“Frëngjishtja në ekonominë zvicerane ka një prioritet të lartë. Prandaj, është edhe nevojë që punëtorët e kompanive zvicerane të mësojnë si gjuhë të dytë një gjuhë nacionale të vendit”, tha Bigler.

Edhe korporatat e ndryshme të mëdha zvicerane, si: Migros dhe Coop, kanë theksuar rëndësinë e të mësuarit frëngjisht në shkollat fillore. Edhe SBB Swisscom, Post, promovojnë shkëmbimin kulturor midis pjesëve të ndryshme të vendit nëpërmjet programeve të shkëmbimit në kuadër të kompanive të tyre.

Kompani të tilla, si ABB, Nestle ose AXPO, kanë një përgjigje jo shumë të qartë në këtë drejtim. Shpesh të punësuarit janë rekrutuar nga e tërë Evropa dhe gjuha angleze është gjuha e tyre e përbashkët. Mirëpo në kompaninë Nestle në Vevey shumica e punëtorëve zviceranë flasin gjermanisht dhe frëngjisht. Prandaj shumëgjuhësia rrit mundësitë në karrierë.