Komuniteti arbëresh në Kalabri, me shfaqje kulturore e folklorike

AKD

Ditën e shtunë, më 1 qershor, përfaqësues nga Agjencia Kombëtare e Diasporës morën pjesë në aktivitetin e shfaqjes XXVI kulturore folklorike për vlerësimin e pakicave etnike në komunën Santa Caterina Albanese, në Kalabri të Italisë.

Në rajonin e Kalabrisë ndodhen mjaft komuna arbëreshe, të cilat organizojnë aktivitete kulturore të vazhdueshme, njofton Agjencia Kombëtare e Diasporës. Organizimi i tyre synon ruajtjen e gjuhës, kulturës dhe traditave në komunitetin arbëresh, veçanërisht te fëmijët, përcjell albinfo.ch.

Konferenca e sivjetme iu kushtua shkrimtarit të njohur arbëresh, Francesco Antonio Santori. Në konferencë morën pjesë mjaft personalitete arbëreshe, si Prof. Cettina Mazzei, Ambasadore e Kombit dhe organizatore e aktivitetit; kryebashkiakët e komunave Santa Caterina Albanese dhe Cerzeto, z. Lavalle dhe z. Rizzo; albanologët e njohur Altimari dhe Mandalà dhe dhjetëra përfaqësues të komunitetit arbëresh.

Me nxënësit e shkollave arbëreshe të Kalabrisë u zhvillua një konkurs mbi krijimtarinë e Santorit. Në përfundim të konferencës u ndanë çmime për nxënësit dhe interpretuesit më të spikatur.