Kritikon ambasadori: Mos i shfrytëzoni viktimat për përfitime politike

Një fotografi e publikuar nga deputetja Flora Brovina për të cilën tha se është një grua shqiptare e dhunuar gjatë kohës së luftën nga serbët, ngjalli kritika të shumta në shoqërinë kosovare.

Në lidhje me publikimin e kësaj fotografie shumë personalitete e shoqata reaguan duke thënë se nuk është e dinjitetshme publikimi i saj, për shkak të përmbajtjes.

Më pas doli se e njëjta fotografi të cilën e prezantoi deputetja e PDK-së Flora Brovina, është ndarë nga një video pornografike.

Ambasadori i Shteteve të Bashkuara në Kosovë, Philip Kosnett ka reaguar në lidhje me rastin për të cilin që dy ditë radhazi ka ngritur shqetësime në shoqërinë kosovare.

Ambasadori Kosnett tha se: “Të mbijetuarit e mizorive duhet të trajtohen me respekt, dinjitet dhe ndjeshmëri”.

Ai shtoi edhe se viktimat e luftës në Kosovë nuk duhet të shfrytëzohen nga politika.

“Udhëheqësit e Kosovës duhet të ndihmojnë viktimat të shërohen, jo t’i shfrytëzojnë ato për përfitime politike”, ka thënë Kosnett.