Tensionohet situata mes protestuesve dhe policisë

Policia shqiptare ka ndërhyrë disa herë për të shpërndarë turmën, duke përdorur ujë dhe gaz lotsjellës

Protesta para Parlamentit shqiptar vazhdon të jetë e tensionuar. Demonstruesit e opozitës, disa prej të cilëve të maskuar, kanë hedhur kapsolla dhe tymues në drejtim të policisë të vendosur para Parlamentit. Policia shqiptare u ka bërë thirrje me megafon për të ruajtur qetësinë dhe për të shmangur episode të dhunës në protestë, raportojnë mediat shqiptare.

“Të nderuar protestues dhe organizatorë, kujdes nga personat me maska që provokojnë policinë. Largoni personat me maska, pasi janë në shkelje të ligjit për tubimet. Ata do të mbajnë përgjegjësi sipas ligjit”, është apeli i policisë për protestuesit, një pjesë e të cilëve nuk i kanë ndalur sjelljet e dhunshme, përcjell albinfo.ch.

Policia shqiptare ka ndërhyrë disa herë për të shpërndarë turmën, duke përdorur ujë dhe gaz lotsjellës.

Së fundi, policia po vijon t’u bëjë apel protestuesve që të heqin dorë nga dhuna, pasi në të kundërt do të ndërhyhet forcërisht nga forcat e rendit.

Ndërkohë pranë turmës kanë shkuar liderë të opozitës, si dhe disa ish-deputetë të kësaj force politike.

Disa militantë të Partisë Demokratike janë filmuar teksa ndodhen në tarracën e selisë blu, duke goditur me gurë efektivët e policisë që ndodhen para godinës së Parlamentit.

---