Analistët dhe qytetarët e mirëpresin vendimin e Ramës për ministrat kosovarë

Emërimi i dy shtetasve të Kosovës në Ministrinë e Punëve të Jashtme dhe atë të Arsimit, Rinisë dhe Sportit në Qeverinë e Shqipërisë, ka ngjallur reagime pozitive te kosovarët.

Njohësit e çështjeve politike mendojnë se vendimi i kryeministrit shqiptar, Edi Rama, me këtë rast, është i natyrshëm. Ata arsyetuan edhe moshën e ministrit të ri të Jashtëm, për të cilën kishte edhe zëra qortues, shkruan TCH, përcjell Albinfo.ch.

Analisti Avni Mazreku tha se emërimi i kosovarëve në pozitat e ministrave do të shërbejë për të ardhmen euroatlantike të Kosovës, duke u bazuar – sipas tij, – në pozitën e Shqipërisë në organizatat ndërkombëtare.

Ndërkohë, qytetarët mendojnë se një vendim i tillë do të duhej të bëhej më parë dhe se, sipas tyre, Shqipëria dhe Kosova duhet të jenë një.

Ky vendim i kryeministrit Edi Rama ka qenë befasues, pas shkarkimit të më shumë se gjysmës së ministrave të kabinetit të tij. Rama ka vendosur si ministër të Jashtëm, në vend të Ditmir Bushatit, Gent Cakajn, dhe në vend të Lindita Nikollës, Besa Shahinin.