Rama prezanton ministrin e Brendshëm, Sandër Lleshi

Në seancën e Kuvendit të Shqipërisë kryeministri i Shqipërisë, Edi Rama theksoi se krisja që ka shkaktuar mosdekretimi i Sandër Lleshit si ministër i Brendshëm nga ana e presidentit shqiptar, Ilir Meta nuk është as personale dhe as politike, por kushtetuese.

Rama tha se Presidenti i Republikës nuk ka kompetencë të refuzojë propozimet e kryeministrit, por ka “detyrë që t’i miratojë”, përcjell albinfo.ch.

Pas votimit në Kuvend, është mbajtur  një mbledhje e veçanet e qeverisë, ku kryeministri shqiptar Edi Rama ka emëruar Sandër Lleshin në postin e zv.ministrit të Brendshëm, por me kompetencat e ministrit.

“Në takimin që pata me Presidentin nuk ishim në një mendje lidhur me arsyen e mosdekretimit të ministrit të Brendshëm, por dola me një ndjesi pozitive, pasi të dy kuptuam që ka nevojë për mirëkuptim”, deklaroi kreu i qeverisë.

Për ministrin e ri ka ardhur një mesazh edhe nga BE-ja, ku i është kërkuar atij që duhet të vazhdojë luftën kundër krimit të organizuar.