Hoti: Dialogu duhet  të udhëheqet nga një qeveri e fuqishme

Shefi i grupit parlamentar të Lidhjes Demokratike të Kosovës, Avdullah Hoti ka thënë se dialogu duhet të ketë udhëheqje nga një qeveri e fuqishme duke u bazuar nga Kuvendi i Kosovës.

Këto deklarata Hoti i ka bërë përmes rrjetin social “Facebook”.

“Dialogu mund të udhëhiqet vetëm nga institucione përfaqësuese dhe legjitime, që flasin në emër të shumicës së qytetarëve të Kosovës. Dialogu nuk mund të udhëhiqet nga një qeveri e pakicës, që diktohet në veprime nga vullneti i partnerëve të vegjël të cilët e mbajnë në këmbë. Kryeministri nuk ka asnjë fuqi politike për të udhëhequr këtë proces, e as fuqi për të deleguar këtë autoritet tek dikush tjetër. Është e qartë se ai mund të flasë vetëm në emrin e partisë së tij, por jo në emër të Qeverisë, e cila është copëtuar në zona të interesit. Udhëheqjen e dialogut duhet ta marrë përsipër një qeveri e fuqishme me bazë të gjerë, bazuar në mandat të qartë nga Kuvendi i Kosovës. Kjo mund të arrihet vetëm pas zgjedhjeve të lira, të cilat do të prodhojnë një qeveri stabile”, ka shkruar Hoti.

Sipas tij, qeveria e ardhshme e cila do të udhëhiqet nga LDK-ja do të punoj që të arrij konsensus për dialogun pasi që sipas tij ky proces nuk i takon vetëm një partie apo vetëm qeverisë.