Gjykohet kosovari për tentim vrasje të të bijës

Një gjykatë më e ulët e kishte dënuar atë me 6 vjet burg por prokuroria është ankuar dhe kërkon 13 vjet burg

Sot është paraqitur para Gjykatës së lartë të Cyrihut kosovari Ramiz N. i cili akuzohet për tentimn vrasjeje të të bijës dhe për keqtrajtim të anëtarëve tjerë të familjes.

Sipas aktakuzës, Ramizi 46 vjeçar për vite të tëra ka terrorizuar pesë fëmijët e tij dhe gruan, ndërsa vajzën e tij të madhe M (28 vjeçe) ka tentuar edhe ta mbysë.

Gjykata e Qarkut e Dielsdorfit e pati dënuar atë në qershorin e vitit të kaluar me 6 vjet burg. Por prokuroria, e pakënaqur me vendimin e kishte kaluar lëndën në një shkallë më të lartë. Ajo kërkon 13 vjet burg për Ramizin, i cili, sipas gjykimit paraprak, pas gjashtë muajsh mund të shpallej i lirë (pas faljes së një të tretës së dënimit, që është e zakonshme në Zvicër). 

Në shpalosjen e aktakuzës që u bë sot, u tha se i akuzuari në gusht të vitit 2005 ka provuar ta varte të bijën. Ai së pari e kishte rrahur atë me një shkop druri dhe pastaj ia kishte lidhur rreth qafës një litar të trashë dhe e kishte varur të bijën në një objekt të lartë. Vetëm pasi që e bija kishte humnbur vetëdijen, Ramizi e lëshoi atë poshtë. Motivi i këtij akti dhune ishte se e bija e akuzonte atë se ai kishte një të dashur në Kosovë.

Gjatë ditës së parë të procesit gjyqësor, Ramiz N. ka lëne pershtypje të njeriut të qetë, ndërkohë që ka kundëreshtuar të gjitha pikat e akuzës. Ai ka pranuar vetëm se i ka rrahur ndonjëherë fëmijët por vetëm për shkakun se nuk shkonin mirë e mësime. Dhe më së shumti çfarë u ka bërë atyre ka qenë “ndonjë flakaresh dhe ndonjë goditje me rryp”.