Zvicër: Kontroll special për pasagjerët nga Kosova!

Kompanitë ajrore nga Kosova, Emiratet Arabe, Tanzania dhe Kenia duhet t`ua dorëzojnë të dhënat e udhëtarëve autoriteteve zvicerane

Për të parandaluar imigrimin ilegal, nuk mjafton vetëm kontrolli i kufijve dhe i aeroporteve zvicerane.  Kështu kanë konstatuar autoritetet kompetente zvicerane, të cilat kanë pohuar se nga tetori i vitit të kaluar kontrollimi bëhet edhe në vendet e nisjes së imigrantëve potencialë ilegalë, që dmth. në aeroportet e vendeve “të dyshimta”.

Ndër këto vende është edhe Kosova!

Kompanitë ajrore që operojnë nga Prishtina, Dubai (Emiratet Arabe) Dar es Salam (Tanzani) dhe Nairobi (Kenia) janë të detyruara që Zyrës Federale për Migracion (BFM) t`ua dorëzojnë të dhënat e të gjithë pasagjerëve që udhëtojnë me aeroplanët e tyre.

Ndërkaq, duke filluar nga shtatori, në këtë rreth  aeroportesh të dyshimta do të hyjnë edhe ai i Moskës dhe i Stambollit, ka bërë të ditur për gazetën “NZZ am Sonntag” zëdhënësi i BFM-së Jürg Walpen.

“Me këto masa do të ndiohmohet përmirësimi i kontrollimit të kufijve dhe luftimi i migrimit ilegal”. BFM të dhënat që i merr nga kompanitë ua dorëzon autoriteteve të kontrollimit të kufijve. Këto të fundit pastaj kanë mundësinë që të shfrytëzojnë kohën e fluturimit të për t`i bërë kontrollimet e para.

Këto masa mundësojnë që në të ardhmen për çdo muaj në duart e mbikëqyrësve të kufijve të dorëzohen të dhënat personale të rreth 80 mijë pasagjerëve.Sipas gazetës, kohëve të fundit është shtuar dukshëm numri i të huajve që shfrytëzojnë rrugën ajrore për të hyrë ilegalisht në Zvicër.